شارع الحرية: مسافات و حكايات - شريط وثائقي عن تاريخ تونس و جهاتها عبر تاريخ السكك الحديدية

في الشريط الوثائقي "مسافات و حكايات" اكتشفت برشة حاجات :

1 - اكتشفت إلي التلفزة الوطنية تنجم تستثمر تراث كبير كيف شركة سكك الحديد التونسية و تعمللنا شريط وثائقي يعمل 66 كيف
2 - كنت نعرف إلي تونس فيها الألاف من المناطق الجميلة الغير مستثمرة سياحياً و إلا ثقافياً و إلا حتى فلاحياً و بيئياً، لكن ما كنتش نعرف الأماكن إلي حكاو عليهم في الشريط و ما كنتش نتصور يكون بالجمال هذاك و بالأهمية التاريخية هذيك
3 - كنت نعرف إلي فرنسا كيف ما أي بلد مستعمر، كان مسخر المستعمرة متاعو باش يسلب منها خيراتها و فرنسا سخرت كل الطرق الحديدية الموجودة اليوم في تونس و وصلتها للمناجم و الأراضي الفلاحية الخصبة، لكن ما كنتش نعرف إلي السكك الحديدية نقصت بعد الإستقلال و خلات بعض القرى إلي كانت ما تتوصل مع العالم الخارجي كان بالقطار تولي معزولة
4 - اكتشفت إلي بعض المدن و القرى إلي نسميوها اليوم نائية كانت حية إقتصادياً و إجتماعياً و كانوا يعيشوا فيها جاليات في أحياء فرنسية و إيطالية و إسبانية و مالطية كيف الجريصة و قعفور و الفحص، و اكتشفت إلي قعفور كان فيها سينما قبل الإستقلال!
5 - اكتشفت إلي ثمة مدن وجدت بعد ما بنيت محطة القطار و مدن اندثرت بعد هجر محطة القطار
6 - اكتشفت إلي الأراضي الخصبة و بعض المناجم إلي كان المستعمر يتصرف فيها أحسن تصرف، تم تركها أو سوء استغلالها بعد تأميمها و التجربة التعاضدية و بعد الخوصصة لفائدة فلاحين ما تمش تكوينهم لإستغلالها، حتى أن ها الأراضي كانت تنتج في الأربعينات أكثر من بعد الإستقلال
7 - اكتشفت إلي سياسات التهميش الجهوية بدات مع الإستقلال حيث أن الدولة تركت طريقة ناجعة لإستثمار ثرواتها على طريقة فرنسا و بحثت على تطوير بعض المدن الكبرى و هوني ما نتصورش إلي فرنسا كانت خاسرة كيف بنات كل ها السكك الحديدية
8 - اكتشفت إلي الدولة التونسية عمرها ما تعمقت في مشاكل الجهات، بل و حاولت تطبيق اليات عامة على مشاكل خاصة و معقدة و النتيجة أنها كل تجارب الدولة (التعاضديات و الخوصصة) باءت بالفشل و المشكل أنه عمرو ما صار تقييم لهالتجارب في وقتها لإستخلاص العبر لأن فشلها يعني فشل الدولة و النتيجة تدمير جهات و أجيال عاشت فيها و حلمت باش تهرب منها
9 - اكتشفت أنه الفساد وصل حتى للسكك الحديدية حتى أنه 100 عربة تم تصليحها و تهيئتها للعمل هي لليوم في عداد المفقودين!

أكيد ثمة برشة حاجات أخرى تنجموا تكتشفوها وحدكم و أكيد أنه الشريط يستحق المشاهدة و المؤكد أنه ها البلاد يلزمها برشة خدمة موش برشة سياسة

(مسافات و حكايات - وثائقي عن سكك الحديدية التونسية (خطوط الوسط